டெஸ்ட் ரேங்கிங் : சேவக் "நம்பர்-1'

துபாய்: ஐ.சி.சி., டெஸ்ட் பேட்ஸ்மேன்களுக்கான ரேங்கிங் (தரவரிசை) பட்டியலில், இந்திய வீரர் சேவக் முதலிடத்துக்கு முன்னேறினார்.
சர்வதேச கிரிக்கெட் கவுன்சில் (ஐ.சி.சி.,), டெஸ்ட் வீரர்களுக்கான ரேங்கிங் பட்டியலை நேற்று அறிவித்தது. பேட்ஸ்மேன்களுக்கான ரேங்கிங் பட்டியலில் இந்திய வீரர் சேவக் (863 புள்ளி), முதலிடத்துக்கு முன்னேறினார். சமீபத்தில் தென் ஆப்ரிக்காவுக்கு எதிரான டெஸ்ட் தொடரில் 2 சதங்களை விளாசிய சேவக், இப்பெருமை பெற்றுள்ளார். இத்தொடருக்கு முன் சேவக் 6 வது இடத்திலிருந்தார். இப்பட்டியலின் 2 வது இடத்துக்கு தென் ஆப்ரிக்காவின் ஹசிம் ஆம்லா (842 புள்ளி) முன்னேறியுள்ளார். தென் ஆப்ரிக்க டெஸ்ட் தொடருக்கு முன், 9 வது இடத்திலிருந்த இந்திய வீரர் சச்சின் (805 புள்ளி) 6 வது இடத்துக்கு முன்னேறியுள்ளார். இத்தொடரில் சொதப்பிய காம்பிர் (824 புள்ளி), முதலிடத்திலிருந்து 5 வது இடத்துக்கு தள்ளப்பட்டார்.
ஹர்பஜன் முன்னேற்றம்: பவுலர்களுக்கான ரேங்கிங் பட்டியலில், இந்திய வீரர் ஹர்பஜன் அதிரடி முன்னேற்றம் கண்டுள்ளார். 12 வது இடத்திலிருந்த இவர், 5 இடங்கள் முன்னேறி 7 வது இடத்தை பெற்றுள்ளார். ஜாகிர் (729 புள்ளி) 6 வது இடத்தில் உள்ளார். இப்பட்டியலின் முதலிடத்தில் தென் ஆப்ரிக்காவின் ஸ்டைன் (867 புள்ளி) நீடிக்கிறார்.