மலேசிய இந்தியர்கள் வந்தேறிகள்: பிரதமரின் உதவியாளர் விமர்சனம்

இந்தியர்களை வந்தேறிகள் என்று விமர்சித்ததால் எழுந்த சர்ச்சை காரணமாக, மலேசிய பிரதமரின் உதவியாளர் தனது பதவியை ராஜினாமா செய்ய உள்ளார்.

மலேசிய பிரதமரின் உதவியாளர் நஷீர் சஃபர்.இவர் நேற்று மலாக்கா என்ற இடத்தில் நடைபெற்ற நிகழ்ச்சி ஒன்றில் கலந்துகொண்டு பேசுகையில், மலேசியாவில் வசிக்கும் இந்தியர்கள் மற்றும் சீனர்களை வந்தேறிகள் என்று விமர்சித்தார்.அத்துடன் மலேசியாவில் இந்தியர்கள் சம உரிமை கேட்டால், அவர்களது இந்தியக் குடியுரிமையை அரசு ரத்து செய்துவிட வேண்டும் என்றும் கூறினார்.

அவரது இந்த பேச்சு ஊடகங்களில் வெளியானதைத் தொடர்ந்து பரபரப்பு ஏற்பட்டதோடு, பிரதமருக்கும் தர்மசங்கடத்தை ஏற்படுத்தியது.

இந்நிலையில் இந்த சர்ச்சை தொடர்பாக அறிக்கை ஒன்றை வெளியிட்டுள்ள மலேசிய பிரதமர் அலுவலகம், நஷீரின் கருத்து பிரதமரின் கருத்து ஆகாது என்று விளக்கம் அளித்துள்ளது.

அதே சமயம் நஷீர் யாரையும் இழிவுப்படுத்தும் நோக்கத்தில் பேசவில்லை என்றும், இருப்பினும் தமது பேச்சு யார் மனதையும் புண்படுத்தி இருந்தால் அதற்காக வருத்தம் தெரிவித்துக் கொள்வதாக அவர் கூறியுள்ளதாகவும் அதில் மேலும் கூறப்பட்டுள்ளது.

இதனிடையே இந்த சர்ச்சை காரணமாக நஷீர் தமது பதவியை ராஜினாமா செய்ய திட்டமிட்டுள்ளதாக பிரதமர் அலுவலக வட்டாரங்கள் தெரிவிக்கின்றன.