அரசியல் யுத்தத்தை எதிர்கொள்ள தயார்!​​: சரத் பொன்சேகா

கொழும்பு,​​ பிப்.8: எனக்கு எதிரான அரசியல் யுத்தத்தை சந்திக்க தயாராக உள்ளதாக இலங்கை ராணுவத்தின் முன்னாள் தளபதி சரத் பொன்சேகா அறிவித்துள்ளார்.​ ​​ அண்மையில் நடந்துமுடிந்த அதிபர் தேர்தலில் தனக்கு வாக்களித்த வாக்காளர்களுக்கு நன்றி தெரிவித்து அந்நாட்டு நாளிதழ் ஒன்றில் அளித்துள்ள நன்றி அறிவிப்பு வாசகத்தில் இவை இடம்பெற்றுள்ளன.​ ​​ மேலும் அதில் அவர் குறிப்பிட்டுள்ளதாவது:​ என் மீதான அரசியல் யுத்தம்,​​ விடுதலைப் புலிகளுக்கு எதிரான யுத்தத்தை ​போன்றதாகும்.​ புலிகளுக்கு எதிரான போரில் வெற்றி அவ்வளவு எளிதாக ​கிடைத்திடவில்லை.​ ​ அதைபோலவே எனக்கு எதிரான அரசியல் யுத்தமும் ​அவ்வளவு எளிதாக முடிந்து விடாது என கருதுகிறேன்.​ இத்தகைய யுத்தத்தை எதிர்கொள்ள தயாராக உள்ளேன்.​ ​​ ஜனநாயகத்துக்கு எதிரான செயல்பாடுகளுக்கு எதிராக நான் குரல் கொடுத்ததாலேயே என் மீது நெருக்குதல்கள் தொடர்கின்றன.​ எனது சகாக்களும்,​​ ஆதரவாளர்களும் கைது செய்யப்பட்டுள்ளனர்.​ இருந்தாலும் இந்த அடக்குமுறைகளுக்கு நாங்கள் அஞ்சபோவதில்லை.​ ​ இலங்கையில் ஜனநாயகமும்,​​ நீதியும் கிடைக்க தொடர்ந்து போராடுவேன் என்றும் அவர் அதில் குறிப்பிட்டுள்ளார்.